ئەحزابی ناسیونالستی کورد، خوازیاری بەکردەوە لکاندنەوەی کوردستانن بۆ ناو عێراقی عروبی ئیسلامی

گفتوگۆی هەفتەنامەی جەماوەر لەگەڵ عبداللە مەحمود سەبارەت بە حزبی کۆمۆنیستی کریکاریی کوردستان

بەشی یەکەم

جەماوەر: لە ناوەڕاستی مانگی ئاداری ئەم ساڵ حزبی کۆمۆنیستی کرێکاریی کوردستان لە کۆنگرەیەکدا بەیانی دامەزراندنی خۆی راگەیاند. پرسیار ئەوەیە من کاتێ کە سەیری بەرنامەو ستراتیژی ئێوەم کرد بەتایبەتی لە بارەی کوردستانء مامەڵەی ئێوە لەگەڵ حزبەکانء خەڵکدا لەگەڵ ئەو فۆرمە سیاسیە جیاوازیەکی ئەوتۆم بەدی نەکرد کە پێشتر لە ژێر ناوی (حککع) کارتان بۆدەکردو سەرەنجام چوونە پەراوێزەوەو دەنگی ئێوە لەچاو پێش 14/7 زۆر کزو لاوازتر دەرکەوتء بەشێوەی جۆراوجۆر خۆشتان دان بەو راستیەدا دەنێن؟

عبداللە مەحمود: بە سوپاسەوە بۆ ئێوە. بێگومان هیچ جیاوازیەکی بەرنامەیی لەنێوان حزبی کۆمۆنیستی کرێکاریی کوردستان و حزبی کۆمۆنیستی کرێکاریی عێراقدا نییە، ئەمە بەومانایەیە کە ئێمە هەدوو حزب خۆمان بە حزبی چینی کرێکارو حزبی مارکسیست وئەنتەرناسیونالست دەزانین.

بەڵام ئەوەی کە هەمان پلاتفۆرمان هەیە، هەمان نەخشەو ڕێگاچارەمان بۆ کێشەکان هەیە، ئەمە دروست نییە، چونکە کۆمەڵگای کوردستان و کۆمەڵگای عێراق، ئێستا بەکردەوە بونەتە دوو کۆمەڵگای لەیەک جیاواز، هەر ئەم واقعیەتەش مەبنای  پێکهنانی حزبی کۆمۆنیستی کرێکاریی کوردستان بوو.

 عێراق و کوردستان بەکردەوە دوو کۆمەڵگاو دوو ووڵاتی جیاوازن، ئەمە ڕەسمیەتی پێدرابێت یان نا، واقعیەتێکی مەلموسە. ئەبێ لە بڕگەیەکی دیاریکراودا سەرباری هەر کێشەو گرفتێک کە لەڕیگاکەیدا هەیە، مۆری لێبدرێت.

ئەم دوو کۆمەڵگایە هەریەکەیان کێشەو گرفتی تایبەتی خۆی هەیە. بۆنمونە لە عێراق کێشەی داگیرکاری ئەمریکا، کێشەی شەڕی تایفی، کێشەی ئەمنی، … کێشەی بنەڕەتی کۆمەڵگان، لەکاتێکدا کێشەکانی خەڵکی کوردستان بریتین لە کێشەی هەڵواسراومانەوەی کۆمەڵگای کوردستان، کێشەی هەڕەشەو لەشکرکێشی ووڵاتانی ناوچەکە،کێشەی هەوڵەکان بۆ لکاندنەوەی کوردستان بە عێراقەوە پەلکێشکردنی بۆ ناو سیناریۆی ڕەشی عێراق، کێشەی دیاریکردنی ئایندەی سیاسی، کێشەی گەندەڵی، کێشەی بیکاری و….. ئەم جیاوازیانە وەڵامی جیایان ئەوێت، پلاتفۆرم و نەخشەی سیاسی جیایان پێویستە. بەو مانایە نەخشەو ڕێگاچارەکان و پلاتفۆرمی حزبی کۆمۆنیستی کرێکاری کوردستان، لەگەڵ هی عێراق زۆر جیاوازن.

تا ئەو جێگایەی کە گوایە هەمان مامەڵە لەگەل حزبەکان و خەڵک دەکرێت، نازانم مەبەستت چییە؟  ئێمە تەنها یەک مەبنامان هەیە بۆ پەیوەندیگرتن لەگەڵ حزب و لایەنە سیاسییەکانی کوردستان، ئەویش ئەوەیە ئەم حزب و لایەنانە تاچەندە ئازادی سیاسی بەڕەسمی دەناسن، تاچەندە ڕێز لە ئیرادەو خواستەکانی خەڵکی کوردستان دەگرن، ئەمە بنەمای پەیوەندی ئێمە، دورو نزیکی ئێمە لەگەڵ هەر حزب و لایەنێکی سیاسی دیاری دەکات.پێشتریش هەر بەم جۆرە مامەڵەمان کردووە، ئایا ئەمە کەمایەسیەکی هەیە؟ نادروستی تیایە؟ بێگومان ئەمە ڕیگەیەکی دروست و مامەڵەیەکی شارستانییە، نەک مەبنای خۆتەسلیم کردن و کێشەی وەرگرتنی موچەو بێدەنگیکردن بەرامبەر بەسیاسیەت و هەڵویستگیریەکان و ستایشکردن و تەشریفات و…تاد. کەبەداخەوە ئیستا رابیتەی ئەحزابەکان لەگەل یەکتر زۆرتر لە پەیوەندییەکی بازرگانی دەچێت تا پەیوەندیەکی حزبی و مۆدێرن .

ئێمە خوازیاری ئەوەین پەیوەندی ئەحزابیش لەگەڵ یەکتر پەیوەندیەکی مۆدێرن بێت، پەیوەندیەک بێت دوور بێت لە وابەستەیی سیاسی و پاشکۆیەتی هەڵوێستگیری و بیدەنگەکردن لە مەسەلەکان و گوێنەدان بە کێشەکانی خەڵک و خەواندنی هەڵوێست گیری و ڕەخنەی جدی لە یەکتری و لە سیاسەت و ڕێگاچارەکان، بە قیمەتی هێشتنەوەی پەیوەندیەکی حزبی و مەسالیحی حزبی ڕووت.

جەماوەر: ئەو ناوانەی کە ئێستا بە کۆمیتەی ناوەندی دەرچوونەوە بە بەڕێزیشتانەوە، زۆربەیان لە دەرەوەی وڵات دەژین، من لەوەش تێدەگەم وەسائیلەکانی تەکنەلۆژیاو ئاسانبوونی سەفەر کارئاسانی زۆری بۆ بەهێزکردنی کۆنتاکت لەگەڵ ناوەوە ڕەخساندووە، بەڵام هیچ لەو حەقیقەتە ناگۆڕێ کە ئامادەیی ڕاستەوخۆ ڕابەرانی حزب لەناوەوە کاریگەری زۆرەترە، لەنێو حزبیشدا پێشتر گلەیی ئەوە هەبوو ئێستاش هەست پێدەکرێ، من لە وتارێکی زمناکۆ عەزیزدا بە روونی ئەم گلەییەم هەستپێکرد، کە ناکرێ حزبایەتی لە ڕێگەی چاتء پەیوەندی تەکنەلۆژیەوە بکرێت، بەتایبەت بۆ ئێوەء ئەو زرفە سیاسیەی کە بەسەر ئێوەدا هاتووە؟

عبداللە مەحمود: ئەوە کە پێوستە ڕابەرایەتی حزب و هەموو حزبێکی جدی لەمەیدانەکە دابێت زۆر دروستە، ئەمە ڕوانینی ئێمەشە، هەربۆیە زوربەی ئەندامانی کۆمیتەی ناوەندی ئێستا لەدەرەوەی ووڵات نین، بەپێچەوانەوە زوربەی ئەندامانی کۆمیتەی ناوەندی و زوربەی ئەندامانی مەکتەبی سیاسی لە کوردستانن یان لەکوردستان ئەژین( مەبەستم لەمە ئەوەیە هاورێیانێک بەرنامەی ژیانی خۆیان وا ڕیکخستووە کە لەساڵدا زوربەی کات لێرەبن و لێرەن)، هاوکات چاوگێرانەوەکی تر بە بەیانی کۆتایی کۆنگرەدا ڕاستی ئەمە دەسەلمێنێت.

جەماوەر:  کاتێ بەو ئەزموونە تێپەڕین، ئایا ئەو حزبی کۆمۆنیستی کرێکاری کوردستان نەگەیشتووە بەو بڕوایەی کە ئاڵۆگۆڕێکی ڕیشەیی بە دونیابینی لەسەر سیاسەتء مەسەلە کۆمەڵایەتیەکان بەدی بهێنێ، وەکو مەنێور حیکمت دەیگوت” کۆمۆنیزم یان سەردەکەوێت یان دەچێتەوە ماڵ” بەڵام هەست ناکەی لەو بۆچوونەی مەنێور حیکمت دا ئەوە ڕاستییە خۆی ئاشکرا دەکات، کە ئێوە پێویستیتان بە دووبارە خوێندنەوەی کۆمەڵگاو جیهان هەیە تا بتوانن لە کەناڵی دیکەوە بێنەوە؟

عبداللە مەحمود: ئەوەی کە ڕێگر بوو لەوەی حزبی کۆمۆنیستی کرێکاریی عیراق، ببێتە حزبێکی خاوەن دەسەڵات و بەهێز لەکۆمەڵگای کوردستاندا، بۆئەوە ناگەڕێتەوە کە دنیابینی و سیاسەت و نەخشەکانی حزب هەڵە بوون و پێویستیان بەچاوپێداگێرانەوە هەیە، واقعیەیەتەکان بەیانی ڕاستییەکان دەکەن. بەڵکە ئەوەبوو کە ئەو سیاسیەت و نەخشەو ڕێگاچارانە کە حزبی کۆمۆنیستی کرێکاریی عێراق خستبوونییە دەستورەوە، هەم دروست بوون و هەم عەمەلی بوون و لەگەڵ خواستەکان و ئارەزوەکانی خەڵکی کوردستان دەهاتنەوە، بۆیەش هێزە دەسەڵاتبەدەستەکانی کوردستان  دەیان ڕیگەو بیانویان گرتەبەر بۆئەوەی لە ڕێگای زۆری هێزەوە، ئەم حزبەی کە ڕۆژ بەڕۆژ پایەگای جەماوەری بەرین دەبۆوەو بەهێز دەبوو، کۆنترۆڵ بکەن و ڕێگەی هەڵسوڕانی سیاسی لێبگرن. ئەگەر  حزب حاشیەی بووەو لە کەنار کۆمەڵگادا بوایە، یان ئەگەر خەڵک پێشوازیان لەسیاسەت و نەخشەو ڕێگاچارەکانی نەکردبایە، بۆچی ئەم حزبە دەکەوتە بە هێرش و پیلانی جۆراوجۆر؟  بێگومان ئەوکاتە پێوستی بەوە نەبوو کەس بیر لە لێدانی بکاتەوەو ئەم کارنامە ڕەشەش بۆ خۆی تۆماربکات.

تا ئەو جێگایەی باسی چاوخشاندنەوە یان ئاوڕدانەوەیە لە ڕابردوی خۆمان، ئەمە تایبەتمەندیەکی بزوتنەوەی کۆمۆنیستی و کرێکارییە، ئێمە لەوبارەوە هەمیشەو بەردەوام، چاو دەخشینینەوە بە راِبردومان، بەنەخشەکانمان، بە سیاسەتمان، بۆئەوەی بزانین خاڵە بەهێزەکانمان کامانەن و خاڵە لاوازەکانمان کامانەن. لەو بارەیەوە ترسێکێمان نییە.

ئەوە کە مەنسور حکمەت دەلێت، مەبەستەکەی ڕۆشنە، دەڵێت کۆمۆنیزم لە ووڵاتانی وەکو عێراق و کوردستان یان دەبێت لەماوەیەکی زەمەنی دیاریکراودا ببێت بەهێز یان شکستی دەدەن، ئەمەش حەقیقەتێکە، مەبەستەکەشی رۆشنە، لەم وولاتانە پرۆسەی هەلبژارن و سیستەمی پەرلەمانی لەدرۆیەکی شاخدار زیاتر هیچی تر نییە، بۆیە میکانیزمیک بۆ بوون بەهێز لەم وولاتانە جیایە لەوەی لەوولاتیک دابیت سیستەمی پەرلەمانی و هەڵبژاردنی تیا بێت. لە کۆمەڵگای نانۆرماڵ و کۆمەلگایەکدا کە تەقلیدی و لیبرالی و بزوتنەوەیەکی لیبرالی و لە ئارادانییە، و تەنانەت حزبی لەوبابەتەش بەواقعی بوونی نییە، چاوەڕوان مانەوە بە کاری هێواش و ڕۆتین حزبێکی کۆمۆنیستی بەهیچ شوێنێک ناگەیەنی، یان دەبی ززو میکانیزمەکانی بوون بە دەسەلات و هیز بەدەستەوەبگرێت یان ئەحزابی میلیشیایی و نادیموکراسی ریگەت نادەن و لێت ئەدەن، ئەمە تەجروبەیەکە پڕاوپڕی واقعی کۆمەڵگای کوردستانە.

بەم ڕوونکردنەوەیەوە، دەبی بڵێم ڕاستە، ئێمە نەماتوانی وەکو پێویست کەڵک لە فەزا نیمچە ئاوەڵا سیاسییە وەربگرین بۆ بوون بەهێزێکی خاوەن قودرەت، ئەمەش وای کرد کاتێک دەستمان برد بۆ هەندێک کاری گەورەو بەرەو کۆمەڵایەتی بوون و بەهێز بوون ڕۆشتین، خێرا ناسیونالیزمی کورد پێی تەحەمول نەکراو ئەم تەحەمول نەکردنەی  ئێمەشی لە جیاتی لەڕێگای سیاسی و یاسایەوە، بێنێتە ئارا و بەرەو ڕوومان بێتەوە، وەکو تایبەتمەندییەکی زگماک کەهەیانە پەنایان بۆ هێزی چەک برد.

جەماوەر: ڕاستە، سەربەخۆیی کوردستان ئاواتی هەموو تاکێکی دڵسۆزی ئەم وڵاتەیە کە ناوی کوردستانە، بەڵام ئەوەی لە خوێندنەوەو بەرنامەی ئێوەدا بەدیمکرد، دووبارە سەربەخۆیی کوردستان لە ستراتیژی کاری ئێوە جێگەی سەنتڕاڵی وەرگرتووە، لە کاتێکدا ئێمە دەبینین کە ئەم خواستە لە ئێستا لە ئاستی نێوەدەوڵەتی پشتیوانی رەهای نییەء چوار دەوری کوردستانیش بە تورکء فارسء عەرەب، کاری جددی دەکەن بە سەرنەکەوتنی، خۆشتان دەزانن، تاقە ئومێدێک جگە لە هەوڵء کۆششی خەڵکی کوردستان، کۆمەڵگەی نوێدەوڵەتییە بۆ سەرخستنی ئەو ئەجێندایەء ئەوانیش وەک خۆمان دەیبینین، لە ئاستی سیاسیء پەیوەندیە نێودەوڵەتیەکاندا دابڕوانین لە بەرژەوەندی زلهێزەکان ء معادەلە ئقلیمیەکان کە لە ئێستادا مومکین نییە؟

عبداللە مەحمود: مەسەلەی سەربەخۆی کوردستان، وەکو ڕێگایەک بۆ کۆتاییهێنان بەکێشەی لەمێژینەی خەڵکی کوردستان، یەکێکە لە مەسەلەو کێشەکانی ناوچەکەو ئەبێت چارەسەر بکریت.

بۆ چارەسەری ئەم گرفتە ڕێگای جۆراوجۆر لە گۆڕێدان، تا ئەوجێگایەی بە ئەحزابی دەسەلات بەدەستی کوردستان و ئەو حزب و هێزانەی لە فەلەکی سیاسی ئەماندا دەگەڕێتەوە، ئەمان بە پێی بەرژوەندی ئێستایان خوازیاری گێڕانەوەی کوردستانن بۆ ژیرسایەی دەوڵەتی مەرکەزی، خوازیاری لکاندنەوەی کوردستانی بەکردەوە دابڕاون بۆ ناو عێراقی عروبی ئیسلامی. بۆ ئەم حزبانە یان باشتر بڵێم بۆ بزوتنەوەی قەومی کورد ئەوەی گرنگە بەشداربوونە لەدەسەلاتی ناوەندییدا نەک سەربەخۆ بوونی کوردستان، مێژووی دورودرێژی ئەم بزوتنەوەیە هەمیشە ئەوەی نیشانداوە، هەمیشە و بێپسانەوە بەدوای ئەوەوەبوون کە بەشیان لەدەسەلاتی مەرکەزی هەبێت، ئەم دەسەڵاتە مەرکەزییە هەرناوەرۆکێکی هەبێت وە هەر سیستەمێک بێت، ئەوان بۆیان گرنگ نەبووە نییە. تۆ تەماشاکە مێژووی کێشمەکێشی ئەم بزوتنەوەیە لەگەڵ ڕژیمە یەک لەدوای یەکەکانی عێراقدا بازنەی”شەر، مفاوەزت، شەر” بووە. هەرگیز باسی شەر یان مفاوەزات بۆ سەربەخۆی کوردستان نەبووە، هەمیشە بۆ ئەوەبووە ببنە برابەشی دەسەلات. هەر ئەمەش وای کردووە کە ئەمان ببنە کۆسپێک لەبەردەم خواستی سەربەخۆی خەڵکی کوردستاندا. لەوەش واوتر هەمیشە ئەمان کەڵکیان لە کەلێن و قڵشت و کێشمەکێشی ووڵاتەکان و هەلومەرجی جیهانی و سیاسەتی زلهێزەکان وەرگراتووە و کردویانەتە مەبنای هێزگرتن و مەترەح بوونیان، نەک پشتبەستن بە خواست و ئیرادەو بزوتنەوەی واقعی خەڵکی کوردستان. هەر ئەمەش بووە بەهۆی ئەوەی کە لە ئاکامی لە بەین چوونی ئەم قلشتانەو گۆران لە سیاسیەتی ئیقلیمی جیهانی وایکردووە ئەم بزوتنەو حزبانە کەنار بکەون و باجەکەشی خەلکی کوردستان بیدات. لە یاخی بوونی  شیخ مەحمودەوە، تا ئەیلولی 74 و تا 88 … شاهیدی ئەم راسیتیەن. ئیستاش ئەم سیاسەت چەوتە دریژەی هەیە.

گرتنەبەری ڕێگایەکی سیاسی و هەڵبژاردنی ڕێگاچارەیەک کە کوردستان بە ئاقاری سەربەخۆیدا ببات، هەڵبژاردنی ڕێگایەکی پێچەوانەی تائێستای بزوتنەوەی ناسیونالستی کوردە. و ئەمان پێی نامۆن. جگە لەوەش هەر هەوڵێک بەو ئاقارەدا بەو پاساوە ڕەتدەکەنەوەو لەبەرامبەری دەوەستنەوە، کەوولاتانی ناوچەکە ناهێڵن، تەوژمی دنیا لەگەڵی نییە، زلهێزەکان ملی پێنادەن، وەختی نەهاتووە، مانەوە لەگەڵ عێراق بە قازانجی خەڵکی کوردستانە، بنەمای ئابوریمان رَێگەمان پێنادات، هێز ودامەزراوەی دەوڵەتمان نییە، …. تاد.

ڕاستیەکەی ئەوەیە خودی ئەم پاساوانە و ئەم ڕوانینە یەکێک لە کۆسپە واقعیەکانی بەردەم خواستی سەربەخۆی کوردستانە، وەختێک ئەم پاساوانە لە بڵندگۆی و ئەم حزب و ڕابەرانیاندا دەوترێت، لەکاتێکدا لانی کەم لە دەهەی ڕابردوودا دەیان جار باسی دابەشکردنی عێراق، باسی پێکێهنانی دەوڵەتی سەربەخۆ، لە دەرەوەو لە زمانی سیاسەتمەدرانی دنیاوە هێنراوەتە ئارا. کەچی ڕابەرایەتی بزوتنەوەی قەومی کورد پێچەوانەی ئەمە نیشان ئەدەن.

هەروەها لەهیچ شوێنێکی دنیا بڕیاری جیابونەوەو پێکهێنانی ووڵاتی سەربەخۆ، بێ کێشە نەبووە، بێ هەڕەشەی دەرەکی نەبووە، هەروا ئاسان نەدراوەو ڕەسمییەتی وەرنەگرتووە، خەباتی بۆکراوە، کراوەتە مەسەلەی ڕۆژ، بزوتنەوەی جەماوەری گەورەی بۆ وەڕیخراوە، هاوپشتی و ڕەئی جەماوەری دنیای بۆ کەسب کراوە، هاوپشتی دەولی بۆی هێنراوەتە مەیدان، …تاد.

گرنگیدان بە پرسی سەربەخۆی کوردستان بە سەنتراڵکردنی ئەم پرسە لەلایەن ئێمەوە، لەبەرامبەر  واقعیەتَێکی مەلموسدایە، یەکەم بە پەراوێز خستنی ئەم پرسە لە لایەن ئەحزابی قەومی کوردەوە بۆ بەرژوەندی ئێستایان لەگەڵ دەوڵەتی مەرکەزی و سیاسەتی داگیرکارانەی ئەمریکا، خەتەرکی گەورەیە بە زیانی ئایندەی خەڵکی کوردستانەوە.

دووەم: ڕاگرتنی ئەم هەلومەرجەی کوردستان کە تائێستا هەیە بێئەندازە کۆمەڵگا کوژە. کۆمەڵگای کوردستان، تائێستا سەرگەردانە تائێستا قوربانی نەبوونی دەوڵەتە، قوربانی نەبوونی یاسایە، قوربانی نەبوونی حکومەتێکی دیاریکراوی دەوڵەتێکی بەڕەسمی ناسراوی نێودەوڵەتییە لە جغرافیای سیاسی دنیادا. و ئەمەش وای کردووە هەمیشە نێچیرێکی ئامادەباش بێت بۆ ملهوری نواندنی وولاتانی ناوچەکەو تەنانەت هێزو لایەنە سیاسیەکانی ئیستای عێراق.

هەردوو ئەم هەڕەشەیە، کێشەیەکی واقعییە، ئیتر چارەسەری کێشەی خەڵکی کوردستان لە عێراق و بەغداد نییە، لە دەزگای فکری و سیاسی ئەحزابی قەومی کوردا نییە، ئەمە کاری هێزو بزوتنەوەیەکی سیاسی چەپ و کۆمۆنیست و پێشکەوتنخوازە. کاری حزبێکە کەئیرادەی خەڵکی کوردستان بەڕەسمی دەناسێت و بۆی دەگەڕێتەوە.

هەروەها ئەم لێکدانەوەیە بێئەندازە نادروستە، کە پێت وابێت ئەبێ سەرەتا ووڵاتانی ناوچەکە و زلهێزەکان داوای سەربەخۆی کوردستان بکەن، پاشان ئەحزابی سیاسی و خەڵکی کوردستان ئەم خواستە بهێنە مەیدان، لە هیچ شوێنێکی دنیا هیچ دەوڵەتێک و هیچ زلهێزێک بەخۆشی خۆی نەچۆتە پشت جیابونەوەی ووڵاتێک و بەڕەسمی ناسینی مافی خەڵکێک کە ساڵەها بەدەست گرفتی سیاسیەوە گیرۆدەبوون.

هێنانی ئەوەی با دنیا بێتە پشتمان فۆرمۆلبەندیەکە، و زۆرتر بۆئەوەیە وولاتان حکومەتەکان بین، نەک خەڵکی ئەم وولاتانەو ڕەوتی پێشکەوتنخوازی ئەم دەوڵەتانە.

بێگومان خەڵکی ئازادیخوازی دنیا و کاتێک دێنە پشت داخوازی بزوتنەوەی پێشکەوتخوازی دنیا، کە ناوەرۆکی پێشکەوتنخوازانەی ئەم بزوتنەوانە ببینن، هێزو لەمەیداندابوونی جەماوەرە ئازادیخوازەکەی ببینن. و لەو ڕێگایەوە ئەتوانن گوشار بخەنە سەر دنیای شارستانی و پێشکەوتنخواز تابێنە پشت خواستێکی سیاسی و لەو ڕێگایەشەوەیە دەکرێ وولاتەکان و دەوڵەتەکان وادار بکرێن بچنە پشت ئەم خواستە.

خواستی سەربەخۆی کوردستان خواستێکە، ئەگەر بەناوەڕۆکێکی پێشکەوتخوازیەوە بێهنرێتە گۆڕ، ئەگەر ئاسۆی سۆسیالستی و ئینسانی مۆتۆری بناغەیی جوڵاندن و بەدیهێنانی بێت، بێگومان دەتوانێ هێزی ئازادیخواز و ئینسانی و بزوتنەوەکان لە تەواوی ناوچەکەو دنیا بکاتە پشت وپەنای سەرکەوتنی. ئێمە هەڵگری ئەم دیدو سیاسەتەین بۆ پرسی سەربەخۆی کوردستان و هەر بەومانا ئینسانیەش و بەم ڕوانینەمانەوە پێمان وایە کێشەی خەڵکی کوردستان کێشەیەکی مەرکەزیە، نەک لە عێراق دا بەڵکو لەتەواوی ناوچەکەدا، چونکە بەبێ چارەسەری واقعی و کارسازو ئینسانیانەی ئەم کێشەیە، ناوچەکە ناتوانێ ئارامی سیاسی بەخۆیەوە ببینێ.

        تێبینی : ئەم گفتوگۆیە لەسەر داوای هەفتەنامەی جەماوەر ئەنجامدراوە، بەڵام بەوهۆیەوە کە لە کاتی خۆیدا بڵاویان نەکردەوە، خۆمان بە پێویستمان زانی بەدوو بەش لە ئۆکتۆبەردا بڵاوی بکەینەوە.