ئۆکتۆبەر: کومیتەی رابەری رێکخراوی کوردستان، 4ی ئەم مانگە کۆبونەوەی فراوانی خۆی بەست، سەرەکیترین باسەکانی ئەم کۆبونەوەیە چی بوون؟
عەبدوڵا مەحمود: هەر وەکو لە ڕاگەیاندنی کۆمیتە ڕابەریدا هاتووە، میحوەریترین باسەکانی کۆبونەوەکە، بریتی بوون لە: یەکەم، باسى کاریگەرى ئاڵوگۆرە سیاسیەکانى عیراق لەسەر وەزعى کوردستانء نەخشەى هەڵسورانى حزب، ئەم باسە کە لەلایەن لیدەری حزب رێبوار ئەحمەدەوە پێشکەش کرا، تیایدا ئاماژەی بەو فاکتەرانە کرد کە چەند ساڵى رابردوو بنەماى ستراتیژى حزبى لە کوردستان پێکدەهێنا، بە ڕوخانى ڕژێمى ناسیونالیستى بەعس، ستەمى میللى لەسەر خەڵکى کوردستان نەما، هەروەها سەرگەردانى سیاسى پێشوى کوردستان، گۆراوە بە سەرگەردانی گشتى عیراقء بە پێچەوانەى ساڵانى پیشوەوە کوردستان لەگەڵ سەراسەرى عیراقدا چارەنوسێکى هاوبەشی پەیداکردوە کە لە ئاستى سەراسەریدا یەکلادەکرێتەوە. غەیرە دینى بوونء غەیرە قەومى بوونى حکومەتى ئایندەى عیراق زامنى ئەوەیە کە هەموو دانیشتوانى عیراق دوور لە هەر ناسنامەیەکى قەومىء دینى، لە مافى یەکسان بەهرەمەندبن. هەروەها لەسەر بناغەى لێکدانەوەى وەزعى ئێستاى کوردستان میحوەرە سەرەکیەکانى سیاسەتء نەخشەى هەڵسورانى حزب روونکرایەوە.
دووەم، بەندیکی ترى کۆبونەوەکە تایبەت بوو بە گفتوگۆیەکى هەمەلایەنە لەگەڵ ریبوار ئەحمەد لیدەری حزب و ئەمجەد غەفور رەئیسی مەکتەبی سیاسی. لەم بەندەدا کە ئامادەبوان بەشداریەکى گەرمء چالاکانەیان کرد، لەسەر مەسەلە جۆراوجۆرەکان بە تایبەت هەڵسورانى چەند مانگى رابردووى حیزب لە شارەکانى عیراقء جێگاورێگاى حیزب، هەڵوێستى حیزب بەرامبەر مەسەلەو رووداوە گرنگەکانى ئەمرۆى عیراق، بەرنامە عەمەلى هەڵسورانى حیزب لە ئێستادا، بەدیلى حیزب بۆ دەرهێنانى کۆمەڵگا لە سیناریۆى تەڵخى ئێستا….گفتوگۆکراو، ڕوشنایی خرایە سەر ئەم هەلومەرجە و ئەو ئەرکانەی لەدڵی ئەم هەلومەرجەدا ڕوبەڕوی حزب دەبێتەوە.
سی یەم، تایبەت بوو بە نەخشەکاری دەورەیی هەڵسورانی حزب لەکوردستان کە جەخت لەسەر سەرەکیترین ئەوکارانە کرا لەکوردستان کە لەسەر بنەمای سیاسەت و جیهەتگیریەکانی حزب دەبێ بخرێنە دەستورەوە. لەسەر بنەماى ئەم باسە کارو هەنگاوە عەمەلیەکانى سێ مانگی داهاتوو لە لایەن کۆمیتە ڕابەریەوە پەسەندکرا.
ئۆکتۆبەر: ئەگەر بکرێت بەکورتى هەندێک لەبارەى باسى ئالوگۆرەکانى کوردستانء جێگاو ڕێگاى حیزبء دەورونەخشێک کە دەبآ حیزب بیگێرآ بۆمان بدوێیت.
عەبدوڵا مەحمود: بەپێ ی ئەو ئاڵوگۆرانەی کە بە لەدەسەڵاتکەوتنی بەعس و، شەریک بوونەوەی ناسیونالیزمی کورد لە دەسەلاتدا هاتۆتە ئاراوە، لە لایەکەوە ستەمی میللی سەرخەڵکی کوردستان کۆتایی پێهاتووەو مەسەلەیەک بەناوی کێشەی ستەمی میللییەوە نەماوە، وە لە لایەکی ترەوە سەرگەردانی سیاسی و هەڵواسراوی کۆمەڵگای کوردستان لە چوارچیوەی بێناسنامەیی ووڵاتی دەرهێناو کوردستان بوو بە بەشێک لە عێراقێکی سەرگەردان. بەپێ ی ئەم ئالوگۆرە سەرەکیەش کە ئێستا لە کوردستان پێکهاتووە، ڕێگا چارەی پێشوی حزب بۆ گرفتەکان یان رونتر بڵێم ستراتیجی حزب بەپێی ئەم ئاڵوگۆرانە گۆرانی بەسەردا هاتووە. ئەگەر بەپێ ی هەلومەرجی پێشوو، رێگا چارەی حزب لەکورستان بریتی بوو لە کۆتاییهێنان بەسەرگەردانی سیاسی و هەڵواسراوی کۆمەڵگا و چارەسەری ستەمی میللی، لە رێگای تیکۆشانی حزب لە پێناو جیابوونەوەی کوردستان و پێکهینانی دەوڵەتێکی غەیرە قەومی و غەیرە دینی و دامەزراندنی دەسەڵاتی راستەوخۆی خەڵک، ئەوا ئەمرۆ مەسەلەی لێکهەلپێکانی خەباتی خەڵکی کوردستان لەگەڵ باقی خەڵکی عیراقدا لە پێناو کۆتاییهێنان بەو سیناریۆ ڕەشەی کە ئێستا کۆمەڵگای عێراق گیرۆدەی بووە، بووەتە تێکۆشان بۆ دامەزراندنی دەسەڵاتی ڕاستەوخۆی خەڵکی سەراسەری عیراق، لەڕێگای پێکهینانی دەوڵەتێکی علمانی و غەیرە قەومی یەوە و بەرپاکردنی کۆمەڵگایەکی ئازادو یەکسان و خۆشگوزەران لە سایەی جمهوری سۆسیالستیدا.
بەپێی ئەم تەێویرە، ئێستا چارەنوسی تەواوی خەڵکی عێراق بەیەکەوە گرێی خواردووە، هەرچەشنە پێشرەویەکی خەبات و تێکۆشانی خەڵکی ناوەراست وخواروی عیراق راستەوخۆ کاریگەری لەسەر خەبات و تێکۆشانی خەڵکی کوردستان دادەنێت و بەپێچەوانەشەوە، هەر پێشرەویەک لە کوردستاندا راستەوخۆ کاریگەری دەبێت لە سەر پێشرەویەکانی ناوەراست و خواروی عیراق. لەسەر ئەم بنەمایەشەوە حزبی ئێمە لەکوردستان خەبات وتێکۆشانی خۆی بۆ هاندان و رێنوینی کردنی خەڵکی کورستان لە دەوری ئەم تەوەرە سەرەکیانە دەباتە پێشەوە.
یەکەم، سازدانی خەڵکی کوردستان لە دژی پێناسەکردنەوەی حکومەتی عیراق بە ناسنامەی قەومی عەرەبی. حزبى ئێمە ئەمە بە دووبارە هێنانەگۆری هەلاواردنی قەومی دەزانێت. بۆ بەرگرتن بە هەرەشەیەکی لەو چەشنە هەموو توانای خەباتکارانەی خۆی بۆ لێک هەڵپێکانی خەباتی خەڵکی کوردستان لەگەل باقی خەلکی سەراسەری عیراق دەخاتە گەر.
دووەم، ئەوەى کە ئەمرۆ ئەحزابى ناسیونالیست دوبارە لە قاڵبى فیدرالیزمداو لە ژێر ناوى مەسەلەى کورددا دەیخەنەروو، بە تەرحێکى کۆنەپەرستانەء قەومپەرستانە دەزانێت بۆ وەرگرتنى بەشى خۆیان لە دەسەڵاتى سیاسی بە نرخى خوڵقاندنى شەرو کێشەو تەفرەقەى قەومى لە نێوان دانیشتوانى سەربەزمانە جیاجیاکانى عێراقدا، ئەمەش هەڕِِِەشەیەکی گەورەیە لەدژی تەواوی خەڵکی عێراق، کە لایەنە قەومپەرستء ناسیونالیستء ئیسلامیەکان بەدوایەوەن. بەرگرتن بەو مەترسیەو بە سەرهەڵدانەوەى کێشەو هەلاواردنء ستەمى میللى لە عیراقدا، یەکێکی تر لەو ئەرکانەیە کە ڕوبەروی خەڵکی کوردستان و حزبی ئێمە دەبێتەوە.
هەروەها پرۆژەی بەرەو ریفراندۆم کە ماوەیەکە ناسیونالیزمی کورد سپاردویەتی بە نووسەرو قەڵەم بەدەستانی مۆڵەتپَیدراوی خۆی، کە بە جیا لەوەی پرۆژەیەکە بە مەبەستی گوشار خستنە سەر ئەمریکاو ئەنجومەنی حوکم بۆ زیادکردنی ڕێژەی بەشداری ناسیونالیزمى کورد، هاوکات بەدەر لەمە هێنانەگۆری ئەم مەسەلەیە. وەستانەوە بەڕووی ئەم هەوڵەشدا یەکێکی ترە لە نەخشەی کاری ئیمە.
لەسەر بناغەى ئەمانە حیزبى ئێمە هەموو جۆرە نەخشەو تەرحێکى کۆنەپەرستانەى فیدرالیزمى قەومىء دابەشکردنى دەسەڵات لەسەر بناغەى قەومىء دینى رەت دەکاتەوەو بە توندى لە دژى رادەوەستیت.
چوارەم: کۆتاییهینان بە دەسەڵاتى ملیشیایىء نا شەرعى ئەحزابى ناسیونالیست، پەرەپیدانى خەباتێکى هەمەلایەنە دژى ناسیونالیزمء نەتەوەپەرستى، ڕێکخستنء رابەرى کردنى خەباتء نارەزایەتى جەماوەرى لە پیناو خواستء مافەکانیانء بەرپەرچدانەوەى هێرشء پەلامارى بەردەوامى ئەحزابى دەسەلاتدار بۆسەر مافء ئازادیەکانى خەڵکء گۆرینى هاوسەنگى هێز، بایەخدانی زیاتر بە بزووتنەوەى کریکارىء ژنانء لاوان، بەهێزکردنى سازمانى حزبى بە گشتىء بە تایبەتى لە شوێنى کارو ژیان، بۆ ئەم مەبەستە پەرەدان بە رێکخراوە حزبیەکانء دامەزراندنیان بەوێنەی ئامرازى خەباتء رێکخراوکردنى ڕابەرانء هەڵسوراوانى کرێکارىء جەماوەرى… مەسەلەیەکی دەستبەجێیە.
لە چوارچێوەی ئەم ئەرکانەدا پێداویستی خەباتى هاوبەشى خەڵکی کوردستان لەگەڵ باقی خەڵکی عیراق لەپێناو هێنانە سەرکارى دەوڵەتێکی عیلمانی و غەیرە قەومی ء پوچەڵکردنەوەى نەخشەو پیلانى کۆنەپەرستانەى فیدرالیزمى قەومىء تائیفى لایەنە قەومپەرستء ئیسلامیەکان، سازدانی خەبات و تیکۆشان لە دەورى بەدیلى کۆمۆنیستى. سەرخەتی کارو هەلسورانی حزبی ئیمە لە کوردستان پێکدەهینێ.
ئۆکتۆبەر: ئەم ماوانە نارەزایەتیە جەماوەرەیەکان لە نێو توێژە جیاجیاکاندا دژى هەلءمەرجى سەختى ژیانء زەختء زۆرى دەسەڵاتى ملیشیایى ئەحزابى ناسیونالیستء کارکردیان، لە ئاستێکى فراواندا سەریهەڵداوە. ئایا لەم کۆبونەوەیەدا هیچ باسێک لە بارەى چى کردن بۆ سەرخستنى ئەم نارەزایەتیانەو باشبونى ژیانى خەڵک کراوە؟
عەبدوڵا مەحمود: هەروەکو ئاگادارن رێکخستن و رابەرایەتی کردنی خەبات و نارەزایەتی حەقخوازانەی جەماوەری خەڵکی کریکارو زەحمەتکێشء توێژە جیاجیاکان، فەلسەفەی وجودی حزبی ئێمە پێکدەهێنی، هەر بەوپێ یە قسەو باسی جدی لەسەر زەمینەکانی سەرهەڵدانی دەورەی تازەی نارەزایەتیە جەماوەریەکان و پەرەدان و سەروساماندان پێی بەشێکی گرنکی قسەوباسەکانی کۆبونەوەکەی پێکهینا.
بەڵام سەرەتا رێگە بدەن، ئاماژە بە تایبەتمەندیەکانی ئەم نارەزایەتیە جەماوەریانە بدەم کە ئەم دەوریە لە کوردستاندا وەڕێکەوتووە.
12ساڵی ڕابردوو، لە مەحەکدانی بەکردەوەی دەسەڵاتی ناسیونالیزمی کورد بوو، کە بە کردەوە نیشانیاندا کە ئەم دەسەڵاتە نەک دەسەڵاتی خەڵک نیە، بەڵکو دەسەڵاتی بەرگرتن و سەرکوتکردنی دەورو دەخالەتی خەڵکە لە دەسەڵات و بەرێوەبردندا، ئەم دەسەڵاتە بەدوای کەوتنی بەعس، لە پێناو بەرگرتن بەدەورو دەخالەتی دووبارەی خەڵک لەدەسەڵات و بەریوەبردندا بۆتە بەشێک لەو ئیئتلافە رەنگاو رەنگە قەومی و دینی و تایفی و عەشیرەتیەی کە ناونراوە مەجیلس حوکمی کاتی عیراق، ناسیونالیزمی کورد ئەمجارە ئەیەوێ بەناوی نوێنەرایەتی خەڵکی کوردستانەوە دەورەی داهاتووی حاکمیەتی خۆی بە شەریک بوون لە دەسەڵاتی ناوەندی داهاتوی عیراقدا درێژە پێبدات. ئەگەر دەورەی پێشوو”پێش لە دەسەڵات کەوتنی بەعس”ئەحزابی قەومی کورد خەڵکی کوردستانیان بە بوونی بەعس و دڕندەیەکەی ئەترساند و سەرکوتی ناڕەزایەتی جەماوەری و کریکاری توێژە مەحرومەکانی کۆمەڵگایان ئەکردو بە تابوری پێنجەم ئەیاندانە قەڵەم و سواری شەپۆلی نارەزایەتی خەڵک ببوون بۆ کۆتاییهێنان بە ستەمی میللی ..تاد. ئەمرۆ بەعس لەدەسەڵات کەوتووە و ستەمی میللیش مانای نەماوە.
دانی موچە لە ژێر کۆنترۆتی ئیدارەی مەدەنی ئەمریکا وبەهاوکاری یونسیف لە هەمان بڕە داهاتی پێشوو بە دۆلار بە کرێکاران و کارمەندان وەدابین کردنی بودجە بۆ پرۆژە خزمەتگوزاریەکان، ئەگەر لە لایەکەوە مەلەفی دزین و بە تاڵانبردنی داهات و کرێ ی کرێکاران و کارمەندانی لەلایەن یەکیتی و پارتیەوە خستۆتە روو، هاوکات ئاستی ژیان وگوزەران و چاوەروانیەکانی سەرجەم موچەخۆرانی تا ڕادەیەک بردۆتە سەرەوە.
سەندیکا زەردە بەناو کریکاریەکان و ڕێکخراوەکانی لاوان و خوێندکاران کە یەکێتی و پارتی قوتیان کردبوونەوە و وەکو نوێنەری دەسەڵات کاریان سەرکوت و بێمافی کرێکاران و رێگەگرتن بوو لە رێکخراوبوون و ناڕەزایەتیە جەماوەریەکان لە پاڵ ئەحزابەکانیاندا، جێگایەکیان بۆ نەماوەتەوەء رەوتی روو لە نشێو ئەپێون.
هاوکات ئاوەڵابوونی نسبی بازاری کار بەدوای کەوتنی بەعسدا، ژمارەیەکی زۆری لە ئۆردوی بێکاران گرتۆتە خۆ، وە ژمارەیەکی زۆر لە کارمەندانی رشتە جیا جیاکان تەعیین بوونەتەوە، کە هەرکام لەو هێزە زۆرو زەبەندە داخوازی و خواستی هەنوکەیی و جدیان هەیە.
هەموو ئەمانە زەمینەی سەرهەڵدانی ئەم نارەزایەتیە کرێکاریی و جەماوەریانەن کە چ لە ناوکرێکاران وکارمەندانء چ لە ناو زانکۆ و لاوانء چ لە گەرەکەکاندا، لە ئارادان.
یەکەمین ئەرکێکێش کە کرێکاران و کارمەندان و خوێندکاران و باقی توێژەکانی تر دەبێ لە نارەزایەتی و خەباتیاندا بۆ باش کردنی ژیان وگوزەران و بەدەستهێنانی مافەکانیاندا بیگرنە بەر، یەکەم، رێکخراوبونە لە رێکخراوەی جەماوەری خۆیاندا لە ڕێگای هەڵبژاردنی نوینەرانیان لە خوارەوە و لە کۆبونەوەی گشتیدا، رەتکردنەوەی یەکجاری سەندیکا بەناو کرێکارییەکان و رێکخراوەکانی لاوان و قوتابیان، ئەنجومەنە کارتونیەکانی گەرەک و….. دووەم، وەلانانی هەرچەشنە خۆشباوەریەک بەوەی لە رێگای داواکردن لە یەکێتی و پارتی دەتوانن بە داخوازی و مافەکانیان بگەن، وە لە جێگای ئەودا دەبێ دەسەڵاتی ڕاستەوخۆی خۆیان ممارەسە بکەن و ئیدارەی کارگەو ناوەندەکان خەدەمیەکان لە رێگای هەڵبژاردنی ئازادانەوە بگرنەدەست. دەبێ لەو رێگایەوە رێژەی مووچە، سەعات کار، ئەمنیەتی شوێنی کار، هاتوچۆو جۆری خواردن …تاد. دیاری بکرێت و دابسەپێنرێت، وە بەم شێوەیە دەسەڵاتی بیرۆکراتی و تاڵانی و دزی و بی مافی نەهێلن، وەسەرئەنجام دەبێ نارەزایەتیە جەماوەریەکانی ئێستا بەو ئاقارەدا ببرێنە پێشەوە.
سییەم، خالێکی تر ئەوەیە کە ڕابەرانی کرێکاری و هەڵسوراوانی بزوتنەوە نارەزایەتیەکان چ لە کارگەکان و ناوەندە خەدەمیەکان و چ لە ناو زانکۆو گەرەکەکاندا، لەدەوری ئاسۆو سیاسەت و ریگاچارەکانی حزبی کۆمۆنستی کریکاری عیراق کۆببنەوە، چ بەو دەلیلەی تاکە حیزبە کە پاڵپشتی لە داخوازیە بەرهەقەکانیان ئەکات و چ ئەو حیزبەیە کە لە ڕیزی پێشەوەی ناڕەزایەتیەکانیاندا جەسورانە ڕادەوەستێت، هەموو پشتیوانیەکی خەباتیان دەکات. بۆیە حزب بانگەوازیان ئەکات کە بە حزبەوە پەیوەست بن.
ئۆکتۆبەر: ریکخستنء بەسەرکەوتن گەیاندنى نارەزایەتیە جەماوەرەیەکان، پێویستى بە رێکخراوى حیزبى توندوتۆل هەیە لە محەلدا. لەم بارەیەوە چ هەنگاوێک خراوەتە دەستورەوە؟
عەبدوڵا مەحمود: گومان لەوەدانیە کە زامنی خاراو بوون و بە سەرکەوتن گەیشتنی تەواوەتی نارەزایەتیە جەماوەریەکان بە ئاقاری بەدەست هێنانی داخوازیەکانیان، چ لە کارگەو ناوەندەکانی بەرهەمهینان و خدەمیەکان و زانکۆو چ لە گەرەکەکاندا، بوونی ڕێکخراوەی حیزبی توندو تۆڵە لە و شوێنانەدا. لەوبارەیەوە حزبی ئێمە نەخشەی ڕاکێشانی رابەران و هەڵسوراوان و کەسانی پڕشورو شەوقی هەیە بۆ ناوحزب. حیزب و ڕابەرانی بزوتنەوەی جەماوەری و کرێکاری دوو لایەنی لێک هەڵپێکراون، نە حزبی ئێمە بێ بەشداری ئەو ڕابەرە دڵسۆزو جەماوەریانە، وە نە رابەرانی کرێکاری و بزوتنەوەی نارەزایەتیە جەماوەریەکان بە بێ حزب، بە شوێنێک دەگەن. بۆ ئەو مەبەستە پێکهێنانی کۆمیتەو شانەی حزبی توندو تۆڵ یەکێکە لە ئەولەویاتەکانی کاری ئیمە لە کارگەو ناوەندە کریکاری و خەدەمی و زانکۆو گەرەکەکاندا. لە هەر کام لەو شوێنانە کە کۆمیتەو شانەی حزبی تیایە، شیعاو داخوازیەکان رۆشنترن، مانگرتن و نارەزایەتیەکان فراوانترن، هەڵسوراوانی سیاسی ترو خاراو ترن، بەوهۆیانەشەوە بەدەست هێنانی داخوازی و مافەکان زامنترن.
بوونی شانەو کۆمیتە لە مەحەلاتدا، یانی بوونی حزب و سیاسەتەکانی، یانی رێکخستنی جەماوەری ئەو محەلاتەو رابەری کردنی نارەزایەتیە بەرحەقەکانیان، سەرئەنجام یانی گرتنە دەستی بەڕێوەبردن و وەدیهێنانی خواستەکان لە رێگای هەڵسورانی بەنەخشەو ئیدامەکاری ئەو ڕابەرو هەڵسوراوانە کە ناوکۆکەی حزب پێکدەهێنن.
هوشیارکردنەوەی کرێکاران و کارمەندانء ڕابەرانی بزوتنەوەی لاوان و خوێندکاران و ژنان بزوتنەوەی نارەزایەتیە جەماوەریەکان لەکارگەو ناوەندەکان و لە زانکۆو لە گەرەک دا..بە بەرژەوەندە واقعیەکانی خۆیان، خەتدان بە سیاسەت و دروشم و داخوازیەکانیان، بەرفراوانکردنی روحیەی رێکخراوبوونیان، بردنە سەری ئیرادە و پشت بەستویی بە خۆیان، لە رێگای بەدیهێنانی داواکاریە رەواکانیان وباش بوونی واقعی لە هەل ومەرجی کارو ژیان و خویندن و باش کردنی ژیانی ئێستادا، راستەوخۆ لە گرەوی پێکهێنانی رێکخراوەی حزبی توندو تۆڵدایە، بۆیە حزبی ئێمە ڕێگای پەرەدان بەو نارەزایەتیانە و زامنی بەسەر کەوتن گەیاندنیان بە پەیوەست بوون بە حزب و پێکهینانی حزب لەشوێنی کارو ژیانی کرێکاران و توێژە بێبەشەکانی کۆمەڵگا دەزانێت.
ئۆکتۆبەر: دەکرێ زیاتر لەسەر چۆنیەتى دامەزراندنى سازمانی حزبی لە محەلات و ناوەندە کریکاری و خەدەمیەکاندا، روونکردنەوەی زیاتر بدەی؟
عبداللە مەحمود: چۆنیەتی دامەزراندنی رێکخراوەی مەحەل (واتە رێکخراوەی حزبی شوێنی کارو ژیان) یانی بە حزبی کردن و بە حزبی بوونی ئەو ژمارە زۆرە لە کەسانی پرشورو شەوقی ئامادە لە مەیدانی خەباتی هەرئێستا کەلەریزی پێشەوەی وەدیهینانی خواست و داواکاریەکانی محەلدا لێبراوانە راوەستاون و سوکانی بزوتنەوەى نارەزایەتیە جەماوەریەکانیان بەدەستەوە گرتووە، وە بە مانای تایبەتی ووشەکە پێکهێنانی رێکخراوەی حزبی لە محەلاتدا، یانی پرکردنەوەی جێگای چۆڵی مەسئولیەت هەڵگرتن، بەرامبەر ژیان وگوزەرانی محەل.
سەرکەوتنی نارەزایەتیە جەماوەریەکانء وەدیهێنانی هەررادەیەک لە باش بوونی هەلومەرجی ژیان، بە تایبەت لە هەلومەرجی ئێستادا کە دەسەڵات لە کوردستان خۆی بە بەرپرس نازانێت لە وەڵامدانەوە بە خواستەکانی خەڵکی، وە رێگای دەخالەتی راستەوخۆی خەڵکی نادات لە کاروباری خۆیاندا، هەرچەشنە باش بوونێک لە گوزەران و هەرچەشنە خۆبەریوەبردنێکی محەل، گرآی خواردووە بە پێکهێنانی رێکخراوەی حزبی توندو تۆڵەوە کە دەتوانی زامنی باش بوونی ژیان، بەسەرکەوتن گەیاندنی نارەزایەتیەکان، وە سەرئەنجام گرتنە دەستی ئیدارەو کاروباری محەل دابین بکات.
هەنگاوی یەکەم بۆ پێک هێنانی رێکخراوەی محەل، پەرەدانە بە پەیوەندی هاورییانی حزبی لەگەل رابەرانی راوەستاوء هەرئێستا ئامادە لە سەر رەئسی نارەزایەتیەکانی محەل، وە سەرئەنجام سازدانیان لە حزبدا. سازدان و رێکخستنی ئەو رابەرو هەڵسوراوانە لە حزبدا، بەمانای گرتنە دەستی حزبــــــە لە لایەن ئەو رابەرو هەڵسوراوانەی محەلەوە.
رابەران و هەڵسوراوانێک کە بۆ باشکردنی هەلومەرجی ژیان و گوزەران لە مەیداندان و سوکانی نارەزایەتی جەماوەیەکانیان بەدەستە، کۆبونەوەیان لەدەوری حزبی کۆمۆنیست و کردن و بوونیان بە حزبی لە مەحەلەکەیاندا، یانی بونی حزب لە محەل ، حزبی نارەزایەتیەکان، حزبی باشکردنی هەلومەرجی کارو ژیان، حزبی وەڵامدانەوە بە خزمەتگوزاری و سەرجەم پێداویستیەکانیان، وە حزبی رزگاری بەخش ….تاد.