چەند قسەیەک سەبارەت بە بەرنامە” دنیایەکی باشتر”

عەبدولا مەحمود
abdulla.mahmud@gmail.com
بەرنامە (دنیایەکی باشتر) لە ساڵی 1994 وە نوسراوە، بێگومان ئەو ماوەیە تائێستا، کە دەیەو نیوێکە، ئاڵوگۆری زۆر گەورە و چارەنوسساز وە کاریگەر لەسەر ئاستی دنیا ڕوویانداوە. بەرنامە دوای چەند ساڵێکی زۆر کەم یان باشترە بڵێین لە جەرگەی هێرشی ڕاست و چەپی بۆرژوازی دوای شکست و تەسلیم بوونی سەرمایەداری بلۆکی دەوڵەتی لەبەرامبەر سەرمایەداری بازاری ئازاد دا، نوسراوە. ئەم ئاڵوگۆرە جیهان داگرە گەورەیە کە مۆری خۆیدا لەهەموو هاوکێشە سیاسی و ئابوری و کۆمەڵایەتی و فکری و فەرهەنگی… و هەموو جموجۆڵە سیاسی و ڕێکخراوەیی و حزبیانەی دنیادا، ئاواش مۆرو سیمای ئەو دەورانە بە ڕۆشنی بە بەرنامەوە دیارە.
بەڵام سەرباری ئەم هەموو ئاڵوگۆرە دنیاداگرە، بەرنامە لە ئاستی گشتی خۆیدا بەوێنەی ڕەخنەی مارکسیستی لەم نیزامە و هەموو دەرهاویشتەکانی لە جەنگ و بێمافی و چەوساندنەوەو نابەرابەری ئابوری و هەموو کوێرەوەریەکانی… چ ئاڵوگوڕی تیا بکرێت و چ وەکو خۆی بمێنێتەوە بۆ کاتێکی تر تا حزبەکانی سەر بە ڕەوتی کۆمۆنیزمی کریکاریی بە بەهاوبەشی لەسەر ئاڵوگۆڕی پێویست بە بڕیارو سیاغەیەکی گونجاو دەگەن، هیچ لە حەقانیەتی بەرنامەو بنەما و ناوەڕۆکی سەرەکی بەرنامە ناگۆڕێت. بنەما سەرەکی بەرنامە، کە ڕەخنەی ریشەیی یە لەم نیزامە، بەوێنەی نیزامێکی سیاسی و ئابوری و کۆمەلایەتی …تاد. پایە بنەرەتیەکانیشی کە بریتییە لە بە کاڵا بوونی هێزی کارو خاوەندارێتی چێنی سەرمایەدار بەسەر هۆیەکانی بەرهەمهێناندا، وەکو کڕۆکی سەمایەداری و بناغەی چەوساندنەوە ، و جەنگ و ماڵوێرانی و بێمافی…. وەکو خۆی باقییە.
بەڵام لە ئاستی تایبەتی تردا، ئەو تایبەتمەندیانەی بە پێی وڵاتی لە بەرنامەدا مشەخەس کراونەتەوە، بە ئاڵۆگۆڕی سیستەمی سیاسی، ئاڵوگۆڕی پێویست دەخوازێ و هەرکام لەو حزبانە بەپێی واقعیەتی سیاسی و ئابوری و چینایەتی و سیستەمی سیاسی ئەم دەورانە دەتوانن لە کۆنگرەدا، ئاڵوگۆڕی پێویست بکەن.
لەو نێوەدا پێویستی ئاڵوگۆر لە بەرنامەدا بۆ هەردوو حزبی عێراق و کوردستان زۆر بەرجەستەیە. ئێمە لێرەدا تەنها لە پەیوەند بە بەرنامەی حزبی کۆمۆنیستی کرێکاریی کوردستانەوە گرنگترین ئەو ئاڵوگۆڕانە کە بە کەوتنی بەعس پێویستە بکرێن لە بەرنامەدا ئێشارە پێدەکەین و ئەکەینە بابەتی گفتۆگۆ.
کەوتنی بەعس و دەسەڵاتی دوای بەعس
لە دەسەڵات کەوتنی ڕژێمی بەعس بەوێنەی سیستەمێکی سیاسی دیارکراو سەرباری ئەوەی کە بەرهەمی شۆرش و هەڵسانی جەماوەری لەخوارەوەی خەڵک نەبوو، بەلام کەوتنی ئەم ڕژێمە بۆوە مایەی ئاڵوگۆرێکی گەورە لە پێگەی ناسیونالیزمی عەرەبی لە دنیای عەرەبداو لە عیراقیشدا.
ئەگەر دامەزراندنی دەوڵەتی عێراق بەوێنەی دەوڵەتێکی عەرەبی و قەومی کە عێراق بە بەشێک لە نیشتمانی عەرەب و خەڵکەکەشی بە بەشێک لە نەتەوەی عەرەبی پێناسە کردبوو، وە لەیەکەمین ساتەکانی پێکهاتنیەوە، هەڵگری فایرۆسی دەمارگیری قەومی بوو. ئەوا بەدیاریکراوی ڕژێمی بەعس لەماوەی دەسەڵاتدارێتی خۆیدا نوینەرایەتی بە کردەوەی ئەو دەمارگیرەیە قەومیەی بەدەستەوە گرت. بەنەخشەوە ئاراستەی کرد و بەزۆر مۆری ناسیونالیزمی عەرەبیدا لە ناوچەوانی دانیشتوانی خەڵکی عێراق. هەروەها بە دکتاتۆریەتێک کە لەبەرامبەر بە ئازادی و ناڕەزایەتییە سیاسی و جەماوەریەکان پیادەی دەکرد، جێگای بۆ هیچ دەنگ و ڕەنگێکی ناکۆک بەخۆی نەدەدا سەر بەرزبکاتەوەو پێبگرێ، بەزوویی لەرێگای دەزگا هەمەڕەنگە سەرکوتکەرو جاسوسیەکانەوە، ڕوبەڕووی سەرکوتی خوێناوی دەبۆوە. هەر بزوتنەوەیەکی سیاسی و جەماوەری لەهەر گۆشەو شوێنێکی عێراق لەدژی هەرچەشنە بێمافیەک و بۆ هەر خواستێکی ڕەوا وەڕێخرابێت، یان هەر بزوتنەوەیەک بەهەر ناسنامەیەکەوە خۆی نوندبێ و نیشان دابێت، لە ئاستی حزبی و رٍێکخراوەی سیاسی یان کەسایەتی و بزوتنەوەی خۆبەخۆ…. و بووبێت، لەخوێن هەڵکێشاوەو بە زەبروزەنگ و سەرکوت، هەوڵی لە بەینبردنی داوە.
لەو نێوەدا هەڵاواردنی قەومی و دابەشکردنی دانیشتوان لەسەر بنەمای ئینتیمای میللی کردبوو بە یەکێک لە پایە بەرجەستەکانی قەوارەو مانەوەی دەوڵەتی عێراق. جگە لەوەش ڕژێمی بەعس بە خۆشکردنی ئاگری هەستی قەومی و سەرکوتکردنی هەر بزوتنەوەیەک بۆ وەستانەوە بەڕووی ئەم ناسنامە قەومیەو هەڵاواردنە ئاشکرایەدا، وە بە وەستانەوەی خوێناوی بەڕووی ناڕەزایەتی و بزوتنەوەی حەقخوازانەی خەڵکی کوردستاندا بۆ مافەکانیان، وە بەکارهێنانی هەموو ڕێگایەکی پڕ زەبرو زەنگ لەبەرامبەر بە خوازیارانی ئۆتۆنۆمی و خودموختاری و مافی فەرهەنگی و خویندن و… کێشەو قڵشتی قەومی کردبوو بە یەکێک لە سیما قێزەونەکانی کۆمەڵگاو بەمەش کێشەی کوردی کردبوو بە گرێیەکی گەورە و ئاڵۆسکاو ترسناکی کۆمەڵگای عێراق. ناسیونالیزمی کوردیش بە بەدەستەوەگرتنی ئەم کێشەیە و خۆبەستنەوەی بە خواستەکانی خەڵکی کوردستانەوە تاڕادەی خۆ بەخاوەن هەڵخستنی و لێکهەڵپێکانی مێژووی حەقخوازانەی خەلکی کوردستان بە مێژووی خۆی لە پێناو پچرینی بەشداری لە دەسەڵاتی مەرکەزیدا ئەم کێشەیەی لە عێراقدا، تائەو پەری خۆی پەلکێش کرد.
کەوتنی ڕژێمی بەعسی قەومی عەرەبی کۆتایی بەم دەورانێکی ڕەش هێنا چ لە عێراق و چ لەناوچەکەدا.
کۆتایهێنان بەدەسەڵاتی بەعس هەر وەکو چۆن خواست و ئارەزووی زوربەری هەرە زۆری دانیشتوانی عێراق بوو، یەکێک لە ئەرک و پێشمەرجەکانی شۆڕشی کرێکاری بوو لە عێراقدا، کە لە بەرنامەی حزبی کۆمۆنیستی کرێکاریدا هاتبوو. چونکە کۆمۆنیزمی کرێکاریی و حزبەکەی لە عێراقدا هەر ئاڵوگۆڕو باش بونێکی ڕیشەیی و بەرجەستەی لە ژیانی مادی و مەعنەوی خەڵکی عێراقدا بە ڕوخاندنی ڕژێمی بەعسەوە گرێدا بوو. لە ساڵی 2003 وە کە رژێمی بەعس نەماوە هاوکات دروشمی ڕوخاندنی ڕژێمیش کە نەماوە، کۆتایی هاتووە.
بەدوای دەسەڵاتی بەعسەوە، دەسەڵات لە عێراقدا تا ئێستا بەدەست ئەمریکایە، و لە ڕێگای پێکهێنانی حکومەتی تەوافوقیەوە ئەمریکا نەخشەو سیاسەتەکانی خۆی لە عێراقدا، دەباتە پێشەوە.
لەعێراقدا تائێستا دەسەڵات لەدەست هیچ هێزێکی سیاسیدا نەگریساوەتەوە، تەمەرکوز نەبووە. دەسەلات لەسەر بنەمای شوناسی قەوم و دین و تایفەو… بە شێوەی تەوافق” سازان” لەسەر مەبنای پێگەی میلیشیایی حزب و هێزو قەوارە سیاسیەکان، و هاوسەنگی هێزو پانتایی قەڵەمڕەوی دەسەڵاتی میلیشیاکانیان، دابەشکراوە. هەرکام لەو هێزو لایەنانەش سەر بەیەکێک لە وڵاتانی ناوچەکەن یان بە پشتیوانی مادی و لۆجیستیکی ئەوان دەجوڵێنەوە و هەندێکیشیان تەنها نەخشی وەکالەتی دەبینن .
هیچ کام لەو هێزە سیاسیانەی ئێستای بەشدار لە حکومەتی عێراقیدا، زەرەیەک ئینسانیەت و ئازادیخوازیان تیا نییە، هیچیان بڕوایان بە دیموکراسی” بەمانا بورژوازی و باوەکەی” نییە، هەموویان هێزی تاسەرمۆخ کۆنەپەرستن و دژی خەڵکین. بۆ بڕانەوەی هەر کێشەیەک لە پەرلەماندا!!، لەسەر شەقام و شوێنی ژیان و گوزەرانی خەڵکیدا، قەتڵگا وەرێدەخەن. تا نیشانی بدەن خاوەنی هێزو توانای جەنگینین.
مامەڵەی حزبی کۆمۆنیستی کریکاریی کوردستان، لەگەڵ ئەم دەسەلاتەدا، پێویستی بە پێناسەکردنێکی ڕۆشنە لە بەرنامەدا، ڕاستە حزبی کۆمۆنیستی کریکاریی کوردستان لەگەڵ دەسەڵاتی بورژوا- ناسیونالیستی کورد بەرەو ڕووە و مەیدانی سەرەکی هەڵسوڕانی کوردستانە. ئەوەش ڕاستە کە زوڵمی قەومی لەسەر کوردستان نەماوە، بەڵام مادام تا ئێستا کوردستان بە ڕەسمی لە دەوڵەتی مەرکەزی دانەبڕاوەو نەبۆتە ولاتێکی سەربەخۆ، ئەگەرو هەڕەشەی دوبارە داسەپاندنەوەی زوڵمی قەومیش هەیە. دەسەڵاتی ناوەندی هەر هێزو بزوتنەوەیەک بیبات بەڕێوەو بەهەر لایەکدا تەمەکوزی دەسەڵات بشکێتەوە، یەکێکە لەو لایەنە سەرەکیانەی کە کۆمۆنیزمی کرێکاریی بەگشتی و حزبی کۆمۆنیستی کرێکاریی لە کوردستان لەگەڵی بەرەو ڕووە. بۆیە بەرنامە دەبێ ئەم ئاڵوگۆڕە پێکبهێنێت، لەجێگای ئەوە فۆرمۆلبەندی تر بخاتە جێگاکەی کە مامەڵەی حزب و شۆڕشی کرێکاری لەگەڵ دەسەڵاتی ئێستای دوای بەعس، مشەخەس بکاتەوە.

کۆتاییهاتنی زوڵمی قەومی و هەڵواسراو مانەوەی کێشەی کورد

هاوکات کەوتنی ڕژێمی بەعس لەدەسەڵات، خود بەخود زوڵمی قەومی لەسەر خەڵکی کوردستان کۆتایی پێهێنا، سیاسەتی تەعریب و تەبعیس و تەهجیرو سەرکوت و زیندان، پلە دوویی … بە کورتیەکەی کۆتاییهاتنی دەسەڵاتی بەعس لەگەڵ خۆیدا کۆتایی هێنا بەشەڕێکی هەمەلایەنەو جەنگێگی هەموو ڕۆژە کە لەدژی خەڵکی کوردستان چەندین دەهە بوو بەردەوام بوو. بەلام دیارە ئەوە مانای ئەوە نییە کێشەی کورد لە عێراقی دوای بەعسدا بەچارەسەر گەیشتوەو بڕاوەتەوە، نەخێر زوڵمی قەومی کۆتایی هاتووە بەلام کێشەی خەڵکی کوردستان بەچارەسەری کارساز و عەمەلی نەگەیشتووە. کێشەی خەڵکی کوردستان بە هەڵواسراوی ماوەتەوە و ڕوبەرووی چەند ئەگەرێکە. لەوانە لکاندنەوەی بە عێراقەوە لە ڕێگای هەوڵەکانی بزوتنەوەی قەومی کوردەوە کە هەوڵەکانیان کۆکە لەگەڵ هەوڵی بزوتنەوەی قەومی عەرەبی لەچواچێوەی بەڕەسمی ناسینی دەسەلاتدارێتی ئێستایاندا بەسەر خەڵکی کوردستاندا و وەرگرتنی زەمانەتی ئەم دەسەلاتدارێتییە ئێستا. هەروەها دەست کورتبوونەوەی بەکردەوەی ئەمریکاو ناکامیەکانی لەعێراقدا زەمینە خۆش دەکات بۆ دەخالەتی زیاتری وڵاتانی ناوچەکە تا ڕادەی داگیرکردنی کوردستان” ئەگەر زۆر کاتیش بیت” و کۆتاییهێنان بەم شێوە لە دەسەلاتدارێتی ناسیونالیزمی کورد، ئەگەرێکەو بەرژەوەندیەکانی دنیا ئەمانەی لە مەحاڵ تێپەراندووە، بەتایبەت بۆ پاشەکشەپێکردن بە پێگەی بزوتنەوەی قەومی کورد لە ئێستادا کە کاریگەری ڕاستەوخۆی لەسەر بزوتنەوەی ناسیونالیستی وڵاتانی ناوچەکە مەلموسە.
وە مانەوەی کوردستان بەو حاڵەتەی ئێستایەوەو بە بارمتە گرتنی کێشەکەی و بەکارهێنانی هەموو ڕۆژەی لەکێشمەکێشی سیاسی نێوان بزوتنەوەی قەومی کوردو بزوتنەوەی ناسیونالیستی عەرەبیدا بە ڕەوت گەلی ئیسلامیشەوە، ئەگەرێکی ترەو ماوەی پێنج ساڵە وەستانی بۆ نییە.
ئەگەری خۆجیاکردنەوەی بزوتنەوەی حەقخوازانەی خەڵکی کوردستان لە ئاسۆو ئامانجی بزوتنەوەی قەومی کورد و وەگەرخستنی خواستی سەربەخۆی خەڵکی کوردستان خستنەگەری ئیرادەی جەماوەری بۆ گۆرینی بە بزوتنەوەیەکی بەهێزی سیاسی و کۆمەلایەتی لە پێناو جیاکردنەوەی کوردستان و پێکهێنانی ولاتێکی سەربەخۆ… ئەو ئەگەرە سەرەکیانەن کە لەبەردەم ئایندەی خەڵکی کوردستاندایە.
ئەمە یەکێکی ترە لەو ئاڵوگۆڕانەی کە دیسان پێویستە لە بەرنامە بێت.
ناسیونالیزمی کورد و لە ئۆپۆزیسۆنەوە بۆ ناو قدرەت
تا ئەو کاتەی بەعس لەسەر کار بوو ناسیونالیزمی کورد، ئۆپۆزیسۆنی ڕژێم بوو. هەمیشە لە کێشمەکێشدا بوو لەگەڵ بەعس بۆ پچرینی بەشی حاکمیەت لە دەسەلاتی ناوەندیدا. کەوتنی ئەم ڕژێمە، لە ئاکامی جەنگێگی فراوانی جیهانیدا لە جغرافیای عێراقدا، بزوتنەوەی ناسیونالیزمی قەومی کوردی لە ئۆپۆزیسۆنەوە کرد بە بەشە دەسەلات و ئەو خەونەی چەندین دەهەبوو بۆی لە “جەنگ و مفاوەزات”دا بوو بە کەوتنی بەعس پێی گەیشت.
سەرباری ئەوەی بزوتنەوەی قەومی کورد لە 1991 وە لەزوربەی کوردستاندا، دەسەلاتی هەبوو، بەڵام مانەوەی بەعس لەدەسەلات و بوونی هێزەکانی لەسەر سنورەکانەوە، لەلایەکەوە ئەم دەسەلاتەی بە ناجیگرو هەرەشەلێکراو ڕاگرتبوو، هاوکات شانشی بەشداری دەسەلاتی لەگەڵ بەعسدا بۆ مەیسەر نەبوو.
کەوتنی بەعس لە ساڵی 2003 وە لەلایەکەوە هەڕەشەی بەکردەوەی دەسەلاتی ناوەندی کە وەکو مۆتەکە وابوو لەسەر دەسەلاتدارتی ناسیونالیزمی کورد کۆتایی پێهێنا، لەلایەکی تریشەوە ئەوانی گەیاند بەدەسەلات و لە ئۆپۆزیسیۆن بوونی خستن. ئێستا ناسیونالیزمی کورد خاوەنی پێگەیەکە لە دەسەلاتی ناوەندو چەندین پۆستی بالا لە ئاستی حکومەت و ئەنجومەنی وەزیران و پەرلەمان و سوپاو ئابوری و…. لەدەست خۆیاندایە و بەشێکن لە قدرەت. لە کوردستانیشدا تاڕادەیەکی زۆر ڕەسمیەتیان بەخشیوە بە دەسەلاتیان و لەهەوڵی ئەوەدان ئەم پێگەو دەسەلاتە بپارێزن و زەمانەتی تێکنەچوونی لە ناوەندەکانی نێو دەوڵەتیدا بۆ مەیسەر بکەن.
کۆمۆنیزمی کرێکاریی لە کوردستان و ناسیونالیزمی کورد
بەدوای کەوتنی بەعسدا و دیار نەبوونی ئاسۆیەک بۆ دامەزراندنی دەسەلاتێکی مۆدێرن و حکومەتێکی سکولاری غەیرە قەومی کە تیایدا دانیشتوانی عێراق بەبێ لەبەرچاوگرتنی ناسنامەی قەومی و دینی و تایفی و وەکو ئەندامانی خاوەن مافی یەکسانی کۆمەڵگا بن، و هیچ جۆرە جوداسازیەک جا پۆزەتیف یان نێگەتیف لەبەرامبەر خەڵکی سەر بەمیللەتە جیاجیاکاندا پیادەنەکرێت. هاوکات بەهۆی خوڵقاندنی جوداسازی و داتاشینی ناسنامەی قەومی و تایفی و مەزهەبی و بەسەر دانیشتوانی عیراقدا، هێندەی تر دابڕاوی بەکردەوەی 13 ساڵی کوردستانی لە عێراق، دابڕاوتر کرد. ئەمەش ئەرکێکی گرنگ و تەنانەت چارەنوسسازی خستە سەرشانی ڕەوتی کۆمۆنیزمی کرێکاریی تا ئارایشی تازە بەخۆی بدات. بەپرسیاریەتی نیشاندان لەبەرامبەر ئەم ئەرکەدا پێداویستی پێکهاتنی حزبی کۆمۆنیستی کرێکاریی بۆ کوردستان، کردە هەنگاوێکی دواخستن هەڵنەگر.
کۆمۆنیزمی کرێکاریی و حزبەکەی” حزبی کۆمۆنیستی کرێکاری عیراق” پێش پێکهاتنی حزبی کۆمۆنیستی کرێکاریی کوردستان، تا ئەوکاتەی بەعس لەسەر کار بوو وەکو هەموو حزبەکانی تری سەر گۆررەپانی سیاسی عێراق و کوردستان و ئۆپۆزیسۆنی ڕژێمی بەعس بوو. بە نەمانی بەعس ئەگەر حزبە دەسەڵات بەدەستەکانی بزوتنەوەی ناسیونالیستی کورد، بونە خاوەنی دەسەلات لە ناوەندو لە ئۆپۆزیسون بوون کەوتن. ئەوا پێکهاتنی حزبی کۆمۆنیستی کرێکاریی کوردستان، ڕاستەوخۆی بەمانای پێکهاتنی حزبی ئۆپۆزیسۆنی واقعی و ڕاستەقینەی دەسەلاتی بۆرژوا_ ناسیونالیستی کوردە لە کوردستانی عێراقدا. ………
دیارە جگە لەو چەند مەسەلە میحوەریە، کە پێکهاتووە لە مەسەلەی کەوتنی بەعس و تەشخیسکردنی سیاسەتی ڕەسمی بەرنامەیی بەرامبەر بەدەسەڵاتی دوای بەعس، کۆتایی هاتن بە زوڵمی سەر خەڵکی کوردستان بێچارەسەری کێشەکەی و هەڵواسراو مانەوەی کێشەی کورد. گۆڕانی جێگاوڕێگای بزوتنەوەی ناسیونالیستی کوردو کۆتاییهاتن بە ئۆپۆزیسۆن بوونی و گەیشتنی بە دەسەڵاتی مەرکەز. پێکهاتنی حزبی کۆمۆنیستی کرێکاری کوردستانء ڕوبەرووبوونی ڕاستەوخۆی لەگەڵ دەسەلاتی بزوتنەوەی بۆرژوا- ناسیونالیستی کورد، بەوێنەی ئۆپۆزیسۆنی ئەم دەسەلاتە. کە مەسەلەی زۆر جدین و پێویستە بە دیقەتەوە لە بەرنامەدا بگونجێنرێن.
هاوکات چەندین مەسەلەی تری گرنگی تریش هەن کە پیویستی بە ئیزافە، ئاڵوگۆر، هەیە لە بەرنامەدا. لەوانە مەسەلەی ڕوبەڕوبونەوەی پیسبوونی ژینگەو ئاڵوگۆری کەش و هەواو کاریگەریەکانی بەسەر بەشەریەتی دنیادا، بریتین لە دوو پرسی زۆر گرنگی ئەم سەردەمەو داهاتوو کە دنیا سەراسیمەی گۆرانکاریەکانیەتی. هەروەها مەسەلەی سوپای و جێگاو ڕێگای سوپای خۆبەخش و حیرفەیی، مەسەلەی پەیوەندی و ڕایەڵەکانی بەیەکەوە بەستنەوەی دنیا لەزمینەی ئەنتەرنێت و تۆرە ئاسمانی و زەمینیەکان و بەیەکەوە گرێدانی دنیا و نەخشی لەم سەردەمەدا…تاد، تا دەگات بە چاوخشاندنەوەی بە بەرنامە لە بارەی وەرگێرانەوە دیارە لێرە مەبەست بەکوردی کردنی نییە، بەڵکە مەبەست سادەکردنەوەو هاوکات ڕاستکردنەوەی ئەو وشەو دەستەواژانەیە کە وەرگێرانەکەی ووردو پر دیقەت نییە، یان قورسەو ئاسان تیگەیشتنی سانا نییە،… ئەمانە ئەو مەسەلانەن کە دەبێ جارێکی تر سەرنجیان بدرێتی و ……
بەو هیوایەی ئەم بابەتە دەروازیەکی کردبێتەوە بۆ بەشداری هەموو هەڵسوڕاوانی و کادرانی ڕەوتی کۆمۆنیزمی کرێکاریی تا بەشداری لەم تەوەرەیەدا بکەن.
12-12-2009