عەبدوڵا مەحمود
abdulla.mahmud@gmail.com
www.abdullamahmud.com
هاوڕێیان و ئازیزان و دۆستان و خۆشەویستانم… لەهەر گۆشەو کەنارێکی ئەم گۆی زەویەن، ساڵی تازەتان پیرۆز بیت… بەهیوای توڕدانی ساڵە رەشەکان.
Beautiful text Happy New Year 2016 with fireworks illustration
هاوڕێیان و ئازیزان… پاش چەند سەعاتێکی تر، دنیا پێدەنێتە ساڵێکی نوێوە… ٢٠١٧ و ساڵی ٢٠١٦ جێدەهێڵێت… ساڵێک جێ دەهێڵێت، کە دەکرێ بوترێت، ساڵێکی رەش، یان رەشە ساڵ. ساڵی رابردوو، ساڵی هێرشی هەمەلایەنەی نیزامی زاڵمانەی سەرمایەداری بوو بۆسەر چینی کرێکار و بێبەشانی دنیا و هێرش بۆسەر مافەکانیان و ئازادیەکانیان. ساڵی ترساندنی ئەو ئؤردوە ئینسانیە بوو کە وێل و خەباتکاری ئازادی و بەرابەری ئابوری وشکۆی ئینسانی بوون. ساڵی بەردەوامی جەنگ و نائەمنی بوو. ساڵی سەربەرزکردنەوەو بەرەو هەورازچوونی راسیزم و سەرەتایەکی بەهێزی قوتبوونەوەی ترامپەکان بوو. ساڵی درندەیی و هەوسارپچراوی تیرۆریزمی نێودەوڵەتی و تیرۆریزمی ئیسلامی سیاسی و داعشی و جەنگی نێوانیان بوو. ساڵی دەستێوەردانی ئامانجدارانە و سیاسی و سەربازی تیرۆریزمی نێودەوڵەتی بوو لە زوربەی زۆری وڵاتانی رۆژهەڵاتی ناوەراست و باکوری ئەفریقیاو ناوەندەکانی بەرامبەرکێی قوتبە جیهانییەکاندا. هەموو ئەمانە لە ژێر ناوی درۆزنانەی روبەرووبونەوەی تیرۆر و دیکتاتۆریەت و گێرانەوەی ئاشتی و ئارامیدا، بەڕێوە بران. بۆرژوازی و هێزە رەنگارەنگەکانی لە ململانێی دەسەڵات و پاوانی دنیاو چاوچنۆکیدا، کلور کلور ئینسانیان کردە قەرەبروت و کەم ئەندام و بە ملیۆنان کەسیشیان لەهەموو تەمەنێک ئاوارەو دەربەدەر کرد. چەندین شارو شارۆچکەیان، خاپورو کردە وێرانە و ئاسەواری شاریان تیا سڕیەوە. لەبەرامبەردا ساڵی هەوسارپچراوی تیرۆریزمی ئیسلامی سیاسی و داعشی بوو، چ لەو شوێنانەی داعش دەسەڵاتی رەشی محمەدی و خولەفاکانی راشدینی تیا پەیرەو دەکردو دۆزەخی دنیای وەهمی سبەینێی، لەسەر ئینسانی زیندوو واقعی سەر زەوی پیادەدەکرد، و چ لە ئەوروپادا دەستی برد بۆ هەموو جۆرە داهێنانێکی ئینسانکوژی و ژیانکوژی لە ناوەندی چەندین شاری جیهانیدا و سایەی ترسی، کردە مۆتەیەکی رەشی دەورەیی. ئەم بەرامبەركێی ئیمپریالیستیەی نێوان بلۆکەکانی دنیاو نێوان تیررۆریزمی نیودەوڵەتی و دەوڵەتی لەگەڵ تیرۆریزمی ئیسلامی سیاسی، هۆلۆکۆستێکی واقعی و حاشالێنەکراوی دنیای ئەم سەردەمەیە…
ئەگەر ساڵی ٢٠١٦ لە ئاستی جیهانیدا، سیخناخ لە جەنگ و کوشتار و نائەمنی، بێکاری و گرانی و بێمافی و نائەمنی و پەرەسەندنی راسیزم … بوو. ئەگەر ساڵی بەرامبەرکیی بلۆکە جیهانیەکان و گۆرەپانی ململانێی تیرۆریزمی دەوڵەتی و نێودەوڵەتی بوو لەگەڵ تیرۆریزمی ئیسلامی دەست پەروەردەکراوی خۆیان، ئەوا کوردستانی ژێرسایەی دەسەڵاتی بۆرژوازی کوردو حزب و هێزە سیاسیەکانی، کوردستانی ژێر دەسەڵاتی میلیشیایی مافیایی و کرێگرتەیدا… جغرافیایەکی ناوازەی ناو ئەم گۆی زەویە بوو… جگە لەسەرکوتی ئازادی و پایماڵکردنی سەرەتاییترین ئازادی و مافە فەردی و مەدەنیەکان، ساڵی هات و مانگ نەهات، ساڵی دزین و تاڵانی موچەی کارمەندان و مامۆستایان بوو. نەوتی زۆر بە ئاشکراو بەدزیەوە فرشراو، کەچی موچە دزراو بڕا و بێ نەوتی و بێغازی و سوتەمەنی لەسەرمای زستاندا بوونە مۆتەکە. خزمەتگوزاریەکان لەهەموو ئاستەکاندا، روویان لە نەمان کرد. هێشتا ئاو و کارەبا دوای چارەکە سەدەیەک لەدەسەڵاتی بزوتنەوەی کوردایەتی، وەکو میوانی ناوەخت و بێ وادە دەردەکەون. هێواش هێواش و بە بەرنامەیەکی نەخشە بۆ کێشراو خزمەتگوزارییە کۆمەڵایەتی و تەرفیهی و تەندروستی و پەروەردەیەکان… بەکەرتی تایبەتی هەرزان فرۆش دەکرێن و ئۆردی کرێکاران و کارمەندانی بێکار زیاتر دەکەن. ئەو کەرتە تایبەتیەی کە دیسان سەرمایەداران و بەرپرسانی میلیشیاو حزبی، بەداهاتی تاڵانکراوی خەڵکی کوردستان، دەیکڕنەوە و پاشان بە گرانی بە خەڵکی کوردستانی دەفرۆشنەوە… ساڵی رابردوو جگە لە بێ موچەیی، باوەشێنکردنی کۆنەپەرستی ئیسلامی و داعشی لەلایەن دەسەڵات و میدیای نۆکەرو عەقڵ شۆراوەو برەوی پێدراو ژینگەی داعشی پاراوتر کرا. زوڵمی سەر ژنان لەو دۆخە نەویستراو و داسەپاوە ئابوری و کۆمەڵایەتیەدا، لەو پەرێ خراپیدا بوو، دواین قوربانی ژێر دەسەڵاتی دژە ژنی کوردایەتی سەروین بوو، کە لە رووداوێکی تەم و مژاویدا، بوو بە قەرەبروت وئەویش چووە ریزی، لیست و پەروەندەی درێژی، قوربانیانی توندوتیژی و شەرەف و پیاوسالاری… لیستی تۆمەتبارانی ئازادی تاوانی ژنانیش، بێ لێپرسینەوە، درێژ تر دەبێت. دۆخی مناڵان و لاوانیش خراپتر… بەتایبەتیش ناچار بوونی لاوان و تازە لاوان بۆ گەڕان بەدوای ژیاندا… بە هەزارانی ناچار کرد، رێگای هات و نەهات بگرن و ململانێ لەگەڵ دەریاو شەپۆلە سەرشێتەکانی، کیڵگەی لوغم و پاسەوانی وێژدان شۆراوەی سەر سنورە دەستکردەکان بکەن و بە داخەوە بەدەیان و سەدانیان، ژیانیان سپارد، بۆ ئەوەی ژیان بدۆزنەوە…
لەناو ئەم ساڵە رەشەدا، دەنگی نارەزایەتی بە تایبەتیش کرێکاران و کارمەندان و مامۆستایان، بە دژی دەسەڵات و ساڵی رەشی بێ موچەیی و بێ خزمەتگوزاریدا، درەوشاوەترین دیاردەی کۆمەڵگای کوردستان بوو… دیاردەیەک کە لە مێژووی بزوتنەوەی رەواو نارەزایەتی جەماوەریدا، بە دژی دەسەڵاتی تاڵانچی و میلیشیایی، هەمیشە بەزیندووی و سەرمەشق بۆ داهاتوو، دەمێنێتەوە…
هاوڕێیان و ئازیزانم… رەشە ساڵی ٢٠١٦ دەروات… با ساڵی داهاتوو بکەینە وەرزی کۆتاییهێنان بەم ساڵە رەشانە، با بەریزی یەکگرتوو رێکخراوەوە، بە هۆشیاری سیاسی و دیدی ئینسان دۆستی و ژیان دۆستیەوە هەوڵەکان و توانا شاراوەکانمان، بخەینە گەر بۆ کۆتاییهێنان بەو ساڵانەی تەنها ژمارەکانیان دەگۆرێت و موسیبەت و بەڵا هەزارسەرەکانیان، دەمێنێتەوە. ئەوەی کە دەتوانێ ژیانی شایستە بەدیبێنێ، کە نان و ئازادی و خۆشبەختی و شکۆی ئینسانی، و دنیایەکی باشتر بنیات بنێت… هەوڵی ئازادانەو بەنەخشەو رێکخروای ئینسانە، بە دیدی ژیان دۆستی و ئینسان دۆستیەوە… با بۆ کۆمەڵگایەکی ئاوا دەست بخەینە ناو دەستی یەکتری و پیرۆزبایی ساڵی تازە، بۆ دەستپكردنی وەرزی ژیان، لە یەکتری بکەین…
دوبارە ساڵی تازە لەهەموو ئێوە و هەموو ئەو ئینسانە پیرۆزبێت، کە وێڵ و خەباتکاری دنیایەکی باشترن… کە ئینسان تیادا بەنرخترین سەرمایەیە.
دوا کات و ساتی ٢٠١٦