پێویستە ئامادەکاری بکریت بۆ گێرانەوەی داهاتی دزراوی خەڵکی کوردستان…
دزی و تاڵانی ئاشکرای داهاتی خەڵکی کوردستان، لەلایەن دەسەڵاتی بۆرژوازی کوردو بەرپرسە حزبی و حکومیەکان و بنەماڵە سیاسیە دەسترۆشتووەکان، ئاشکرایە. دزی بە شێوەی یاسایی!! و نایاسایی، بە ئاشکراو بەنهێنی، بەشوێنێک گەیشتووە کە تەنانەت بەشێک لە بەرپرسانی حزبەکان لەململانێیاندا لەگەڵ یەکتری رایدەگەیەنن. یان ناچارن دانی پیابنێن و ناتوانن ئەو دزییە بەربڵاو و سیستماتیکە پەردەپۆش بکەن. فرۆشتنی نەوت بە دزی و بەئاشکرا، بە بۆری و بە تانکەر، بە فەرمی و بە شێوەی نافەرمی، تا دەگاتە تەخشان و پەخشانکردنی زەوی و تاپۆکردنیان، دەستبەسەرداگرتنی هەموو جۆرەکانی بازرگانی و هات و چۆ و پەیوەندیەکان و بەڵیندەرایەتیەکان و کۆمپانیاو کارگەکان…تاد، بەشوینێک گەیشتووە کە ژیانی شاهانە و فیرعەونی بۆ ژمارەیەکی کەم و نەداری و برسێتی و هەژاری ملیۆنی کردۆتە نسیبی خەڵکی کرێکار و زەحمەتکێش. بە ئاشکرا دوو دنیای جیاواز و دوو شێوە ژیانی جیاواز لە کۆمەڵگەدا دەبینرێت. دنیایەکی بەهەشت ئاسا لە دنیای واقعی ئێستاو دۆزەخێکی واقعی بۆ زوربەی زۆری خەڵکی کوردستان.
راپۆرت و بەڵگەنامەو دیکیۆمیێنتەکان، ژمارەو داتا راگەیەنراوەکانی سەروەتی بەرپرسانی حزبی و حکومی و بنەماڵە دەسترۆشتوە حزبیەکان، ڕۆژانە بڵاودەکرێنەوە یان دزییەکەیان دزە دەکاتە دەرەوەو میدیاکان چ لەسەر ئاستی ناوخۆ و چ لەسەر ئاستی دنیا ناچارن کە رایبگەیەنن و بڵاوی بکەنەوە. بێگومان بڵاوکردنەوەی ئەو بەڵگەو داتاو ئامارانە گرنگن و پێویستە هەموویان بە دیکۆمێنت بکرێن و بەردەوامیش بەدواداچوون بکرێت بۆ ئاشکراکردنی سەروەت و سامان و پارەی کەڵەکراو نێو بانقەکانی بەرپرسان چ لە ناوخۆی کوردستان و چ لە دەرەوەی وڵات، بەڵام ئەمە تەنها هەنگاوێکە. هەنگاوی لەوە گرنگتر ئەوەیە کە پێویستە کاری چر وپر و لێبراونە بکرێت لەسەر ئاستی جەماوەری و فەرمی و یاسایی، بۆ بەدادگا کێشانی ئەو بەرپرسە دزو تاڵانچیانە و گێرانەوەی ئەو کێوە لە داهات و سامان بۆ خەڵکی کرێکارو زەحمەتیکێش و هەژارکراو برسیکراوی خەڵکی کوردستان. هیچ جۆرە خۆشباوەریەک نابێت هەبێت سەبارەت بەدەستەی نەزاهە یان هەوڵی فریوکارانەی دەسەڵات لە ژیر نایێ چاکسازی و دادگاییکردنی دزان و گەندەڵکاران. دز و تاڵانچیان کەخۆیان بەخۆشی خۆیان مل بەگێرانەوەی داهات و سامان و سەروەتی نەقدی و غەیرە نەقدی خۆیان نادەن و ئامادەنین ئاشکراشی بکەن، تەنانەت بەرووی هەر هەوڵ و تەقەلایەکیشدا دەوەستنەوە بۆ پاریزگاریکردن لەو دزی و تاڵانییە یاسایی و نایاسایەکانیان. بۆیە ئەوە ئەرکی رابەران و هەڵسوراوانی جەماوەری و ئازادیخوازو تۆرێکی بەرین لە یاساناسان و دادوەرو لێکۆڵەرەوە ویژدان زیندوەکان و رۆژنامەنووسانی ئازادو نەترس و جڵەونەکراوە، چ لەسەر ئاستی ناوخۆ و چ لەسەر ئاستی وڵاتانی دنیادا، بەنەخشەوە دەست بۆ هەڵدانەوەی فایلی دزان و ئاشکراکردن و بە دادگاکێشانیان ببرێت و پارەکانیان بلۆک بکرێت و پاشان بەشێوەیەکی ئاشکراو دادوەرانە بۆ خەزێنە هاوڵاتیان و سەرچاوەکانی داهات بگێردرێتەوە. وە زەوی و کۆمپانیا و باخچەو کیڵگە نەوتیییە دەستبەسەرداگیراوەکان و ریزە دوکان و خانوو شوقە و مۆڵ و عەمبارەکان و ریزی کەژاوەی ئۆتۆمبیل و …تاد، پێویستە دەستی بەسەردا بگیرێت و لەژێر چاودێری لیژنەی هەڵبژێردراو نوێنەرانی جێمتمانەی جەماوەریدا بۆ هاوڵاتیان بگێردرێتەوە و خاوەنانی ئەو دزی و تاڵانییە ئاشکرایەش رادەستی یاسای عادلانەو سزای یاسایی بکرێن.
داهاتی کۆمەڵگەی کوردستان، داهاتێکی ئیکجار زۆرو زەوەندە، سامانی ژێر زەوی و سەر زەوی کۆمەڵگە بە زیادەوە بەشی چەند قاتی ئیستای دانیشتوانی کوردستان دەکات، کە ژیانی تەسەل و خۆشگوزەرانیان هەبێت و خەڵکی موحتاجی هیچ پیداویستیەکی ژیان و گوزەرانی شایستە نەبێت. ئەوەی کەوای کردوە ئۆردوی هەژاران و برسی و بێکارەکانی کوردستان رۆژ بەرۆژ زیاد بکات و ژمارەیەکی کەم لە بەرپرسانی حزبی و حکومی سەرمایەدارەکان سامانەکانیان هەڵبکشێت و ببنە خاوەنی ملیاردها و ملیۆنان دۆلارو کیوێێک لەسامان و سەروەت، ئەو دزی و تاڵانیییە کە لەرێگای دەست بەسەرداگرتنی دەسەڵاتەوە، لەدەستی خۆیاندا مۆڵیان کردوە. هەنگاوی یەکەم بۆ لەدەسەڵات خستنی ئەم دەسەڵاتە دەست بەسەرداگرتنی سامان و سەروەتەکانیان و گێرانەوەیەتی بۆ جەماوەری ملیۆنی کریکار و بەرهەم هێنی خودی خەڵکی کوردستان. بۆ ئەم نەبەردە دەبێ ئامادەبین و دەست پێبکەین.